Laçınlı Adiləm… Nə Hafizəm mən… – Adil Cəfakeşin şeiri
“Azad Şuşa” şair Adil Cəfakeşin maraqlı bir şeirini əziz oxucularına təqdim edr.
Adil Cəfakeş
Şeir adlı “cadu”yam
Könüllər oxşayıb, ruhu məst edən,
Şeir, sənət adlı “cadu”yam, qağa.
Hərdən səngisəm də, sönən deyiləm,
Haqqın alovuyam, oduyam qağa.
Kəsib söz ovunda hər gün bərə mən,
Gah zirvə güdürəm, gah da dərə mən.
Vallah düşməmişəm göydən yerə mən,
Mən də sənin kimi adiyəm, qağa.
Qocalar dilində şerim ninnidi,
Dildən çox kövrəyəm, gözüm çənlidi.
Zaman dirijordu, qəm müğənnidi,
Mən isə hicranın uduyam, qağa.
Ötən günərimlə xudafizəm mən,
Arxamca dolanbac gələn izəm mən.
Adil Cəfakeşəm, nə Hafizəm mən,
Nə də ki, Şirazlı Sədiyəm, qağa.
Rəy bildir